Asatyaniki Avala

తెలుగు సాహితీలోకమంతా గర్వపడాల్సిన విధంగా రచనలు చేసిన రచయిత కాశీభట్ల వేణుగోపాల్. కానీ అప్పటికే ఏర్పరచబడిన పఠనాభిరుచులతో, ఇదే సాహిత్యం అని స్థిరాభిప్రాయం ఏర్పరుచుకుని ఇప్పటికీ అదే పాత సాహిత్యం చదువుకుంటూనో, లేదంటే అసలు చదవడమే మానేసిన తెలుగు పాఠకుల మధ్యలో అస్సలు ఉండాల్సిన రచయిత కాదు కాశీభట్ల వేణుగోపాల్. ఎక్కడో ఏదో చిన్న యూరోపియన్ దేశంలో పుట్టబోయి దారితప్పి ఇక్కడ తెలుగుదేశంలో పడిపోయాడీయన. మధ్యతరగతి బతుకుల్లోని సాధారణతను, తెలుగు సాహిత్యం అనే environment లోని కంట్రోల్డ్ నెస్ నీ స్వయంగా విస్మరించి ఒక కొత్త ఎక్స్ప్రెషన్ అన్వేషణలో ప్రయోగాలు చేస్తూ తన దారిని తానేసుకున్న రచయిత కాశీభట్ల. నిరంతరం ఏదో తెలియని వెలితి. చింత. ఎగిరిపోవాలనే కోరిక. రెక్కలు తెంపబడ్డ పక్షి. వింతప్రపంచంలో అజ్ఞాతవాసి. పరిస్థుతులకు ఎదురీదుతూ నిరంతర పోరాటం. ఇబ్బందులు. ఇరుకు ఇళ్ళు. అంతే ఇరుకు మనసులు, తీరని కోరికలు – మధ్యతరగతి జీవితంలోని ఈ అంశాలన్నీ అక్షరాలై ఖాళీ పేజీల్లోకి ప్రపహించడమే కాశీభట్ల రచనలు. రోజువారీ జీవితంలోని దుమ్మూ ధూళితో కప్పబడిన జీవితపు అస్పష్టతలను తొలగించి మనిషిలోని నిజరూపాన్ని బయటపెట్టే ప్రయత్నమే కాశీభట్ల రచనలు. అంతేకాదు చదివే పాఠకుల స్వంతభావనల వెనుక వున్న స్వాతిశయాన్నీ, నార్సిసిజంనీ బట్టబయలు చేస్తాయి. మొదటి నవల “నేనూ-చీకటి” నుంచి ఇప్పుడు వస్తున్న సరికొత్త నవల “అసత్యానికి ఆవల” వరకూ ప్రతీ కథలో ఇదే ఆయన ప్రయత్నం.

‘అసత్యానికి ఆవల’ ఒక సాధారణ సంఘటనల కథ కంటే మనిషి జీవితాన్ని, అతని ఆలోచనలను, సంబంధాలను, అంతరంగ సంఘర్షణలను పరిశీలించే నవల. కథలో ఎ. సత్యం, నాగలింగం, షణ్ముఖ వంటి పాత్రలు కీలకంగా కనిపిస్తాయి. వీరి జీవితాలు, ప్రవర్తనలు, ఆలోచనలు, చుట్టూ ఉన్న సామాజిక వాతావరణం ద్వారా మనిషి తనకు తాను చెప్పుకునే నిజాలు, ఇతరులకు చూపించే రూపం, వాటి వెనుక దాగి ఉండే అసలు స్వభావం వంటి అంశాలు ముందుకు వస్తాయి. ఇరుకైన ఇళ్లు, ఇరుకైన మనసులు, తీరని కోరికలు, జీవితంలో కనిపించే వెలితి, చింత, పరిస్థితులతో చేసే పోరాటం వంటి మధ్యతరగతి జీవిత అనుభవాలు నవలలో భాగమవుతాయి. ఈ సాధారణ జీవిత దృశ్యాల నుంచే మనిషి అస్తిత్వం, నిజం, అబద్ధం, స్వీయభావన వంటి పెద్ద ప్రశ్నలను రచయిత ముందుకు తీసుకువెళ్తారు. ఈ నవలలో “అసత్యం” అనేది కేవలం అబద్ధం అనే అర్థంలో కాకుండా, మనిషి తన గురించి, తన జీవితంలో ఉన్న సంబంధాల గురించి, తన చుట్టూ ఉన్న ప్రపంచం గురించి నిర్మించుకునే ముసుగులు మరియు భ్రమలకు కూడా సంబంధించిన భావంగా కనిపిస్తుంది. ‘అసత్యానికి ఆవల’లో పాత్రల జీవితాలను చదువుతూ ముందుకు వెళ్లే కొద్దీ, పాఠకుడికి తన చుట్టూ ఉన్న మనుషులు, సంబంధాలు, రోజువారీ జీవితం కూడా కొత్త కోణంలో కనిపించేలా చేసే రచన ఇది. కాశీభట్ల వేణుగోపాల్ రచనా ప్రస్థానంలో ఇది ఆయన చివరి నవలగా కూడా నమోదైంది.